Arantzazuko kanta berriakPlegaria a la SSma. Virgen de Aránzazu
Testua: Autore ezezaguna
Musika: Eustakio Azkarate
Eskuzko partitura (AranMusArtx, D 28)
Arantzazu musikaren mendeetan. 2. siglos XIX.-XX. mendeak, Arantzazu: AusArt Records ekoiztetxea, 2005, 5. kanta
– AAB: 093 –
Mendi gain-gainean zaude
Arantzazuko Ama,
Lurbe hontako erbestuen
Ama laztan zaitean [sic].
On hutsa baitzara, Ama,
gu semeaz [sic, semeoz?] erruki.
Estrofa
Arantza gainian zauden Ama,
errukiz begira zaiguzu,
zure begiak gugana itzuli
arren, Ama, zu gabe ez utzi.
Ama maitea, zuri dei gaude
erbeste negartsu hontatik.
Zure begiak gugana itzuli,
arren, Ama, zu gabe ez utzi.
Titulu eta azpititulu horrekin dago Arantzazuko Musika Artxiboan 4 orrialdeko eskuzko partitura, seguruenik kantaren jatorrizko kopia dena: “A Coro de 5 v. m. y solo de tiples con ac. de org.”. Autoreak, Eustakio Azkarate apaizak, Arantzazuko Frantziskotar Probintziaren kapituluari –batzar nagusiari– eskaini zion bere kanta: “Al muy Rvdo. P. Julio Eguíluz O. F. M., Provincial, y a la Ven. Asamblea de Rvdos. PP. Guardianes de la prov. de Cantabria, reunidos en Capítulo en el convento de Ntra. Señora de Aránzazu (agosto 1946), como prenda de sincero respeto, cordial cariño y devoto afecto, les ofrece este ínfimo obsequio, el u. ministro del Señor, y más indigno hijo y devoto amante de la dulcísima Madre de Aloña”. Partiturak berak 1946ko uztailaren 22ko data darama.
E. Eustakio Azkarate (1887-1965) Arantzazu-zale zen oso, eta, “Ave Maria” pieza bat “A la amantísima y queridísima Madre dulcísima de Aránzazu” eskaintzeaz gain, Arantzazuko bestelako musika-piezarik ere konposatu zuen: Arana–Letamendiaren “Arantzazuko Ama Birjina” kanta ospetsua bestelako doinu eta harmonizazioarekin –berak “Gozos a la Virgen de Aránzazu” izendatu zuen– eta pare bat Benedikta, besteak beste.
Hemengo kanta honen testua, nahikoa traketsa, norena den jakin ez, agian musikariarena berarena. Euskara batuko grafian jartzeaz gain, bestelako aldaketa morfologikoren bat edo beste egin diot.
1947an bertan Arantzazuko Bederatziurrenean behin baino gehiagotan abestu zuten Azkarateren pieza, goizeko meza nagusiaren ondoren, santutegiko beste kanta klasikoekin tartekatuz, urte hartako Bederatziurreneko programak dioenez. Gerora gutxiago abestu izan du Arantzazuko koruak. Arantzazu musikaren mendeetan. 2. siglos XIX.-XX. mendeak CD-aren grabatzaileek, ordea, XIX-XX mendeetako Arantzazuko kanta adierazgarrien artean aukeratu zuten, “Arantzazuko” eta “Arantzazu aldean” abesti klasikoekin batera. Horko 5. kanta da Azkaraterena, Lausardi Koru sinfonikoak interpretatua, David Azurzaren zuzendaritza pean.
AAB: 093
