Testua: Autore ezezaguna
Doinua: Ezezaguna
Eskuzko partitura (testua daktilografiatuta) (AranMusArtx, D 37) (ik. REA/JK, 77. or.)
– AAB: 183 –
Goazen Arantzazura
Mariarengana,
goazen bai eskaintzera
bihotz eder bana.
- Izar bat agertu da
guztiz pozgarria,
hara nola dagoan
arantzan jarria.
Poztu, bada, bai poztu,
o Euskal Herria!
Adi ezazu kontuz
dakarren berria. - Ikusirik zerutik
gure miseriak
pozkidatu nahi gaitu
Birjina Mariak,
pozturik, bada, justu
ta pekatariak
Arantzazura zuzen
ditzagun begiak. - Ilargia Zeruan
duenak oinetan
drist-drist egiten digu
Aloña mendian.
Bihotzean poza ta
kantak mingainean,
ondra dezagun Ama
hau ahaleginean.
- Noeren kutxatikan
irten zan usua,
atzera eramanaz
berri paketsua,
zu zera gaitz guztien
sendagai osua,
zu zera bai, Maria,
Ama txit gozua.
Arantzazuko Musika Artxiboan bada orria, “Goazen Arantzazura” titulua duena: partitura eskuz idatzita eta testu daktilografiatua. Ahots bakarreko kanta da. Leloa eta lau estrofa ditu. Jakin ez zein den autorea, ez testuarena eta ez doinuarena. Artxiboko partiturak ez dakar datarik; 1918kotzat jo dut hemen, baina lehenago idatzia eta musikatua ere izan daiteke.
Abesti-testu bera aurki daiteke REA/JK-ko 77. orrialdean ere, Zarauzko erromesaldirako ateratako esku-orrian: sarrera eta lehen estrofa bakarrik, ordea, eta doinurik gabe. Ezaguna da 1918an Arantzazuko Andre Maria Gipuzkoako zaindari izendatu zutenean, erromesaldi bereziak antolatu zituztela Gipuzkoako herrietatik, apiriletik irailera bitartean (ik. J.A. Lizarralde, HVSA, 481-495).
Datarik ez dakar esku-orriak, baina 1918kotzat jo dut; zaharragoa ezin izan, bertako lehen kanta, “Arantzazura”, urte horretakoa-edo delako. Gainera orri berean dago beste “Aurrera” izeneko kanta ere, “Gipuzkoako Zaindariari bezela kantatzeko”, azpian dioenez.
AAB: 183
