Testua: Pedro Migel Urruzuno
Arantzazu, III, 1923, 19. zenb., 310-311 or.
Pedro Migel Urruzuno, Koroi eder bat. Bertso-bilduma [Auspoa liburutegia, 291], 2005, 291-292 or.
Doinua: Musikatu gabea
Aloñan zauden izar ederra
Arantzazuko Birjina,
inortxok ere ez zaitu maite
Euskal Herriak adina.
- Begira nola larros(a) eder bat
dagoan arantz batean,
zorioneko mendi Aloñak
dauzkan harkaitzen artean.
Banatzen duan usai gozora
datoz bideak betean
kristau taldeak, honuntz pozikan,
nahigabez hemendik jutean. - Artzai gaztetxo batek zaitu Zu
harkaitz artean arkitu;
eta, nork esan artzai gaxoa
nola dan zuzaz [sic] harritu?
Harkaitz guztiak edertasunez
nola dituzun argitu,
Errodrigotxok berri gozoak
kalera ekarri ditu. - Artzai gaxoak, harriturikan,
galde bat egiten dizu:
Horren ederra izanik ere,
nola zaude arantzan Zu?
Geroztik honuntz mundu guztiak
ospatzen du Arantzazu;
zure kontura, Ama maitea,
Euskal Herria har zazu. - Aloñak daukan edertasuna
gaur da osoro haundia,
bada dirudi, argiren argiz,
dala Taborko mendia;
bertara pozik, aldapak gora,
bizkorrik dator jendia,
uste duela mendi eder hau
dala zeruko bidia. - Agorte haundi eta luzeaz
lurrak zeudela egarri,
nekazariak, berriz, zerura
begira estu ta larri,
euri gozatsu ta ugariak
laister diztezu [sic] ekarri;
herri guztiak gaurtik nahi dute
zure mantupean jarri. - Zorionean zerutik jetxi
zinan Aloña mendira,
geroztikako gure guztion
atsegin danak han dira;
ezin aspertuz, Ama maitea,
gaude horrera begira;
gure bihotzak beti zurekin
daude ta egongo dira.
Arantzazu aldizkariak argitaratu zuen aurrenekoz Urruzunoren abesti--testu hau, Aita Arrue zuzendariak eskatuta nonbait, eta berari eskainia, aldizkariak aitortzen duenez. Arrue bera olerkaria eta konposatzailea zen; eta testu hau, tituluak adierazten duenaz gain, musikatzeko eta, lelo eta guzti, taldean abesteko idatzi zuela esan daiteke; baina, dirudienez, ez Arruek eta ez beste inork zion doinurik ipini.