[Ama maite Mariak] (1886)

Testua: Jose Matias Balerdi
Doinua: Lauko txikiarena (doinu jakinik gabe)
G2T, 52-53 or.

1. Ama maite Mariak
   lagun eraginda,
   Arantzazun jendia
   ugari izan da.
   
   Kantartea
   
   Mariak giatuta
   badabil jendea,
   zuzen bilatuko du
   Zerura bidea.
   
   
2. Peregrinazioko
   jende debotua,
   Arantzazun izan da
   txit ondo hartua.
   
   
3. Birjina Ama Maria
   Arantzazukua,
   urte hontan izan da
   bai koroatua.
   
   
4. Birjina koroatzen
   ikusteagatik,
   jendia etorri da
   leku askotatik.
   
   
5. Gipuzkoa, Bizkaia
   eta Arabatik,
   Mariak izan ditu
   bisitak danetik.
   
   
6. Probintzi euskaldunak
   ez galtziagatik,
   Maria Arantzazun
   hor dago gugatik.
   
   
7. Denbora guztietan
   horren milagruak
   izan dira txit asko
   eta zabalduak.
   
   
8. Hargatik obispo ta
   erlijiosuak,
   egin dituzte hemen
   aurten funtziuak.
   
   
9. Euskaldunak izanik
   seme debotuak,
   Birjina honek ditu
   txit eskojituak.
   
   
10. Birjina honen ondoren
    dabiltzan jendiak,
    anparaturik ditu
    bai karidadiak.
    
    
11. 11Mariak Arantzazun
    poztu du jendia,
    beti defenditzeko
    Jaunaren Legia.
    
    
12. Gure fedia egonik
    zerbait ilundua,
    Mariak utzi digu
    oso argitua.
    
    
13. Birjinak zabaldu du
    ugari frutua,
    pekataria alaitu,
    indartu justua.
    
    
14. Erakusteko gure
    poz eta atsegina,
    bisitatu zaitugu
    Maria Birjina.
    
    
15. Guztiok egin degu
    asko ahalegina,
    Zu ondratziagatik,
    Zeruen Erregina.
    
    
16. Asko sentitzen degu
    Zugandik joatia,
    eta ez genduke nahi
    desanparatzia!
    
    
17. Gure izatia da
    Zu gabe tristia!
    Deseo degu, bada,
    berriz ikustia.
    
    
18. Zu uztia Maria
    bihotzak ezin du!
    Har zazu, tori eta
    bedeinka gaitzazu.
    
    
19. Zure bendiziuaz
    bagoaz etxera,
    etortzeko asmuan
    atzera honera.
    
    
20. Zu bitartian guzaz
    ahaztuko ez zera,
    agur, Ama maitia,
    despeditzen gera.
    
    
21. Agur zeruko Erregina,
    Jesusen Ama, agur,
    agur, Ama gurea,
    agur, agur, agur.

Jose Matias Balerdiren aurreko kantari egindako oharrak balio du honako ere. Aurrekoaren parekoa da zalantzarik gabe, azpitituluak adierazten duenez: aurrekoa Arantzazurakoan abestekoa zen bezala, hemengo hau etxera itzultzerakoan abestekoa.

Garbi dago taldean abestekoa dela, “Kantarte” eta guzti. Erromesentzako kanta da. Garai hartan oinez egin beharra zuten erromes-taldeek Oñatitik Arantzazurakoa eta Brinkolatik Arantzazurakoa behintzat. Seguruenik oinezko bidegintzan kantatzekoak ziren hemengo estrofak. Batek abestuko zituen horiek, eta taldeak “kantartea” errepikatu.

Lauko txikiaren hainbat doinu egokitu ahal zaie ahapaldiei, baina autoreak berak ez zuen doinu jakinik adierazi.