Zortziko Haundia Maria Arantzazukoari (1881)

Testua: Patrizio Antonio Orkaiztegi
Jesus eta Mariaren billeracoentzat..., 118-120 or.
Doinua: “Arantzazuko Ama Birjina” (Modesto Letamendia)
– Ik. doinua, AAB: 001 –

Kantartea

Zuretzat beti ditezeala
izan nere alabantzak:
Zuk nigandikan dituzu kentzen
nere nekeen arantzak.

1. Ezin dituzu, Birjina Ama,
   desanparatu semeak;
   nahiz eta izan gaur ta lehenago
   esker batere gabeak,
   errukiara zaitu mugitzen
   penetan gu ikusteak;
   alaba beza Ama biguna
   Kantabriako jendeak.
   
   Zuretzat beti ditezeala, etc.
   
   
2. Aitortzen degu dadukazula
   gu ondo ikusi nahia;
   guretzat zure begiratua
   agertutzen da alaia:
   Zure bihotzak ematen digu
   amore-suaren gaia;
   bagendukean orain baino lehen
   ezagutzeko garaia.
   
   Zuretzat beti ditezeala, etc.
   
   
3. Elorriaren arantz gogorrak
   hauturikan Zuretzako,
   beste arbolen frutu gozoak
   nahi zinduke guretzako;
   halaxen zinan egondu ere
   Kalbarioan lehenago,
   zeru-Semeaz padezitutzen
   lur-semeen onerako.
   
   Zuretzat beti ditezeala, etc.
   
   
4. Pekatuaren arantzak dira
   Zuk nahi ez zindukeanak;
   umeak gaizki ikusitzeaz
   asko du sufritzen amak.
   Jesusengana bertatikantxe
   bihurtzen gerade danak;
   junta gaitzala orain geroko
   Berarekiko laztanak.
   
   Zuretzat beti ditezeala, etc.

Doinuari dagokionez, aurreko kantaren oharrera ekarritako Orkaiztegiren aipu berbera gogoratzen dugu hemen: “Arantzazuco Virgiñari jarri zayozcan laucoac (Alabantzac gure Amari etc.) eta zortziko aundiya (Zuretzat beti diteceala etc.) cantatu litezque aurtengo erromerirako Letemendico don Modestoc Tolosan atera dituan musiquetan” (Orcaiztegui, 1881, 123. or.).

Horietako bat J. I. Aranaren “Arantzazuko Ama Birjina” kantari jarritakoa da, hemengo honi ondo datorkiona, bertso-neurrien aldetik behintzat.

Dirudienez, Orkaiztegiren kanta hau ez du abestu izan Arantzazuko koruak. Santutegiko Musika Artxiboan ez dago horren partiturarik.

AAB: 001