Arantzazuko kanta berriakTestua: Erraimunda Errenderia
Musika: Tomas Maria Elduaien
Zeruko Argia, 1935. 201 zk., 136-137 or.
– AAB: 060 –
Horra hor Arantzazu,
horra Ama garbia.
Horra begiz begira
gure zaindaria.
- Neke-arantzez bete-betia
Euskal Herria da Arantzazu;
Arantzazura, Amatxo maite
kuttun horixe datorkigu. - Arantz-artean sortu izan arren
inoiz arantzak jo ez zaitu;
Euskal Herria arantzartean,
Ama gozoa, begiratu. - Hodei artetik goizeko izarra
itsas-gizonai dagerkie;
ta Ama Birjina Arantzazutik
maite dutenai izar zaie. - Goizeko izarrak itsasgizona
ekaitz erdian argitzen du;
are gehiago Euskal Herria
poztutzen dezu, Arantzazu.
Erraimunda Errenderiak olerki bat du: “Arantzazuko Miren Garbiari obertikia”. Gipuzkoarra aldizkarian argitaratu zuen aurrenik (VI, 1912, 262 zenb., 3. or.), eta Zeruko Argia aldizkarian gero (1935, 201 zk., 136-137 or.), eta urte berean bere olerki liburuan: Errenderi'tar Erraimunda Aba, Olerkiak, Tolosa: I. López Mendizabal, 1935, 18-19 or.
Haren jarraipentzat har dezakegu hemengo abesti-testu hau: leloa berdina du, baina estrofa gehienak ezberdinak dira –hemengo aurrena besteko hirugarrena da–, nahiz eta poema berberarenak diruditen. Agian jatorriz poema beraren estrofak izan daitezke denak, baina hemengoak testu ezberdintzat hartu ditut, besteak beste, musikatu ere beste konposatzaile batek musikatu zituelako hemengo estrofak. Zeruko Argia aldizkariak partitura eta guzti argitaratu zituen; autorea: “Errenderi abaren olerkia”.
Erraimunda poeta bezala Elduaien ere kaputxinoa izan zen, Elduaiengoa eta bataioz Tomas Etxeberria izenekoa. Erlijioso familiatik zetorkien, bada, harreman eta lankidetza-aukera poetari eta musikariari.
Tomas Elduaienen bi pieza musikal ditugu, titulu berekoak: Zeruko Argia-k argitaratua (hemengo hau) eta Martzelino Idoiagak kopiatu zuena (AAB: 061) (ik. ondorengo kanta).
AAB: 060
