Arantzazuko balada eta kopla zaharrak. (Osagarria)Abuztuaren hamabosgarren
Jesus Maria goizian,
Birjiniaren debotatxo bat
Arantzazura zijoian.
Lekukoa: Maria Jesus Igartua (Araotz)
Biltzailea: Ignazio Omaetxebarria (?)
Iturria: GAK, XXVII. doinua
AKDB, 1456. erg.
AAB: 308
Balada-puska hau eta ondorengo hirurak Araozko Errekondo etxeko Maria Jesus Igartua Gaztañaga anderearen ahotatik jaso zituen 1935. urtean, seguruenik Ignazio Omaetxebarriak; transkribatu eta Arantzazuko Balada eta Kanta Zaharren Bildumakoen artean utzi zuen paper solteren batean; gero norbaitek GAK koadernotxoan kopiatu zituen, REA/JK-ko beste doinu zenbakitu guztien ondoren, bertako zenbakiei jarraituz.
Arantzazuko balada ezagunaren aldaera da hemengo hau, bere doinu bereziarekin. Kantaren lehen ahapaldia bakarrik kopiatu zuen GAK doinu sortaren kopiatzaileak. Uste izatekoa da jatorriz ahapaldi gehiago zituela, lekukoak kantaturikoak. S. Mitxelenarengandik dakigunez (ik. MDO, 6. kanta, oin-oharra), honako ohar hau idatzia zuen nonbait kantaren biltzaileak: “La cantora cantaba con mucha indecisión, nunca repitió la melodía en la misma forma, la tenía casi olvidada”. GAK kopiak ez zuen horren berririk jaso; baina antzeko oharra idatzi zion I. Omaetxebarriak, lekuko beraren ahotatik jasotako “Bertsuak paratzeko” bertso sortari (ik. REA/JK, 143. or.)