Arantzazuko balada eta kopla zaharrak. (Osagarria)
1 Rodrigo deritxona
pastoretxu bat zan,
zapatu egun baten
ahuntzetan joan zan,
hantxe topatu eben
Birjina arantzan.2 Aita zeuria harotza da ta,
mandatu egin iozu,
egin deidala ermitatxu bat,
deritxona Arantzazu,
zazpi teila ta hiru latatxu
urrian nahiku izango ditu,3 San Frantziskoren seme on askok
han izango dabe ostatu.
Nere Ama Birjina
Arantzazukoa,
zein izango ete da
neure komentua?
Biltzailea: Kardaberaztarrak (1935)
Iturria: EERV, XXX, 698. or.; Aitzolen bilduma)
AKDB, 255. erg.
A. Zabalak zuzenean Aitzolen bildumatik jaso zuen. Iturriaren berri eman ondoren, hona: “Jose Ariztimuno Aitzol apaiz jauna zanaren bilduma, 1935 urtean Gipuzkoan, Plazentzian, Kardaberaztarrak izeneko apaizgai-taldeak jaso eta bialdua”.
Eta zera gaineratu zuen Zabalak bere aldetik: “Irakurlea oartuko zanez, erromantze zaarrren eta bertsopaperen puskak alkarri erantsita daude aldaera ontan”. Izan ere, lehen bertsoa Telleriarteko Plazaolaren “Gure Ama Birjina” bertso sortako (1854) 3. bertsotik hartuta dagoela dirudi.